Американскиот портал „Њујорк пост“ ја анализираше актуелната политичка ситуација во Србија, но со посебен фокус на протестите предводени од блокадите против претседателот Александар Вучиќ, кои ја тресат земјата повеќе од 9 месеци.
Како што истакнаа во текстот објавен на нивниот портал, анализирајќи ја детално социјалната криза, во неподносливата августовска жештина, протестите станаа насилни.
„Речиси секоја вечер, центарот на Белград, главниот град, се претвора во бојно поле“, истакнуваат новинарите на „Њујорк пост“.
Како што понатаму опишаа, она што започна како тивок спомен на жртвите од падот на настрешницата на железничката станица во Нови Сад, со текот на времето се претвори во „востание“.
Првично, Вучиќ ги опиша демонстрантите како „добронамерни“ и им нареди на властите да не користат прекумерна сила против гневните маси. Но, неговите отстапки не беа прифатени од студентите. Овој месец, тие ги запалија просториите на партијата на Вучиќ во Нови Сад. Сега бараат негова оставка и распишување предвремени избори.
Сепак, како што тие дополнително истакнуваат, Вучиќ се разликува од сите лидери на Балканот по своите достигнувања.
Во последните 12 години, тој донесе во Србија она што Балканот ретко го знае: стабилност и просперитет.
Во периодот помеѓу 2003 и 2014 година, српската економија беше исклучително нестабилна. Под Вучиќ, иако инфлацијата се зголеми во последните месеци, невработеноста е на рекордно ниско ниво, јавниот долг е намален, а приливот на странски инвестиции е силен.
Тие понатаму тврдат дека некои западњаци грешат кога повикуваат на акција против Вучиќ, претпоставувајќи дека она што ќе дојде по него ќе биде подобро од него.
„Опозицијата, дури и по речиси една година, е без лидерство бидејќи е мешавина од екстремисти и идеалисти, ултранационалисти и националисти. Таа нема никакви доблести на Вучиќ, но ги има сите недостатоци.“
Тие исто така додаваат дека е подеднакво важно да се препознае дека барањето за оставка на претседателот под закана од насилство не е демократски израз на незадоволство. Тоа е, како што велат, антидемократска уцена.
© Vecer.mk, правата за текстот се на редакцијата
