Според инсајдерскиот блог KretaTipp.de, најновите истражувања покажуваат дека присуството на легионела е пронајдено во речиси 50 проценти од примероците од вода. Она што е особено загрижувачко е што примероците се земени главно од хотели и јавни објекти на Крит.
Експертите ги опишуваат резултатите како „загрижувачки“. Легионелата не е безопасна бактерија - таа предизвикува легионерска болест, која може да се движи од симптоми слични на грип до тешка пневмонија. Особено е опасна за постарите лица, лицата со ослабен имунолошки систем и хронично болните пациенти, предупредува германскиот здравствен портал gesund.bund.de, пренесува Bild.
Бактериите природно се наоѓаат во мали количини во водата, но имаат најповолни услови за размножување во топла, застоена вода, идеално на температури помеѓу 25 и 45 степени. Само на температури над 55 степени, според Институтот Роберт Кох, нивниот раст се забавува, а на над 60 степени се уништуваат.
Можни извори на инфекција се тушеви, џакузи, па дури и клима уреди. Инфекцијата се пренесува со вдишување на ситни капки вода што ги содржат бактериите. Туристите кои несвесно ја вклучуваат топлата вода во своите хотелски соби за време на одморот, на тој начин можат да се најдат во сериозна опасност.
Според британскиот весник „Дејли меил“, една британска туристка веќе се заразила со легионерска болест на Крит. Поради сериозноста на нејзините симптоми, таа била примена во болница во Ираклион, каде што била ставена во индуцирана кома и се бори за живот.
Сè уште не е познато кои хотели се погодени. Надлежните органи и туристичките службеници на Крит наводно се информирани, а според порталот „Крета24“, веќе се преземени мерки за ставање под контрола на ширењето на бактериите.
И покрај загрижувачките резултати од анализата на водата, досега не е издадена официјална препорака за избегнување патување на Крит.
© Vecer.mk, правата за текстот се на редакцијата
