Поранешниот грчки министер Јанис Варуфакис, самопрогласен „недоследен марксист“, ќе биде суден по обвинение за поттикнување злоупотреба на дрога. Акцијата на обвинителот следеше откако Варуфакис јавно призна дека конзумирал таблета екстази пред речиси четири децении, објави неговата партија.
Професорот по економија, кој ги разбесни своите колеги од еврозоната со упорното отфрлање на условите од пакетот за помош во замена за реформите што се бараа за време на должничката криза на земјата во 2015 година, рече дека еднаш пробал екстази, или МДМА, дрога што најчесто се поврзува со денс и рејв забави во Австралија во 1989 година.
„Беше одлично искуство до неколку дена подоцна“, рече тој во подкастот „3026: Човечки алгоритам“, додавајќи дека можел да танцува со часови, но потоа страдал од мигрена. Тој нагласи дека во минатото конзумирал марихуана.
„Се обидуваат да го замолчат“
Варуфакис, сега секретар на малата левичарска партија Мера25, треба да се појави на суд во декември. Ројтерс сè уште не можеше да стапи во контакт со 64-годишникот за коментар. Неговата партија објави соопштение во кое ја обвинува грчката конзервативна влада дека се обидува да го замолчи на суд.
„Идејата дека лидерот на политичка партија треба да биде суден затоа што зборувал за своите искуства со дрога пред многу децении не е ниту случајна ниту невина грешка. Ние нема да молчиме. Ниту за провокативната манипулација на судството, ниту за големиот проблем со зависноста“, соопшти партијата Мера25.
© Vecer.mk, правата за текстот се на редакцијата
