Арман Хоџиќ (20) од Босна и Херцеговина освоил 50.000 евра во популарното телевизиско шоу „Дали сакаш да станеш милионер“? во Германија. Оваа недела имало специјална верзија на квизот што се емитувала под името „3-Millionen-Euro-Woche“.
За младиот практикант од Босна и Херцеговина кој живее во Оберхаузен, кој беше заменски кандидат во квизот, се оствари неговиот животен сон.
Откако освои 16.000 евра во шоуто во среда, тој ги инвестираше своите добивки во финалето - и ги зголеми на 50.000 евра, пишуваат германските медиуми.
„Влегов и си помислив, ќе видиме што ќе се случи. Ако на водителот Гинтер Јаух не му се допаѓа некој кандидат, тој сака да го покаже тоа. Но, мислам дека кога на почетокот реков дека се плашам од прашањата бидејќи живеам во Германија само пет години, тој беше на моја страна“, изјавил Арман за германски Билд.
Сепак, на таткото на Арман не му се допаднала подготвеноста на неговиот син да презема ризици.
„Кога татко ми и јас се возевме дома по првото снимање - Оберхаузен е на околу еден час возење од Хирт - тој ми рече да не се коцкам, 16.000 евра се многу пари. Следниот ден отидов на последното снимање со мајка ми. Ѝ реков дека мислам оти би ми се допаднал Јаух. Мајка ми исто така ме советуваше да не се коцкам, додавајќи: „Но, слушај ја својата интуиција“. Па, си помислив, можеби седам тука по втор пат, но имам само една шанса да добијам нешто, па ќе го направам тоа. На крајот, се покажа дека се 50.000 евра. Навистина тоа ми дава добар почеток во животот“, рекол Арман.
Сака да ја ангажира Теа Таировиќ
Изјавил дека би сакал дел од добивката да им ја даде на своите родители.
„И тие секогаш ме поддржуваат. А ова е можност да им вратам нешто“, рекол младиот човек.
Сепак, голем дел од наградата е планиран за една пејачка.
„Постои една пејачка која е исклучително позната на Балканот и која сега ја познавам лично. Теа Таировиќ објави многу хитови, особено во последните четири години. Би сакал да организирам забава и да ја поканам. Нејзиниот хонорар е околу 15.000 евра. Кога му кажав на Гинтер Јаух во емисијата, тој ми рече да го поканам бидејќи и тој ќе отпее нешто“, рекол тој.
Сепак, Јаух не му кажал дали ќе го стори тоа без надомест.
Момчето, родено во Босна и Херцеговина, живее во Германија од 2020 година. Откако освои 50.000 евра, тој трчаше низ студиото, а неговите родители беа на работ на солзи.
© Vecer.mk, правата за текстот се на редакцијата
