Албанија, некогаш скриен бисер на Европа, сега се соочува со експлозивен раст на туризмот што може сериозно да ја загрози одржливоста на локалните заедници и природната средина. Од 2015 година, бројот на туристи во земјата речиси се зголемил тројно, од 3 милиони во тоа време на дури 10 милиони во 2023 година, што е зголемување од 56% во споредба со нивото пред пандемијата.
Албанската влада предвидува дека овој број ќе порасне на 30 милиони туристи годишно до 2030 година, повеќе отколку што моментално имаат Португалија или Хрватска, пишува британски Експрес.
Загриженост за природата и инфраструктурата
Овој ненадеен скок предизвика сериозна загриженост. Весли Дидани, уредник на веб-порталот „Саранда“, предупредува дека некои туристички проекти се градат без никаков урбанистички план, што доведува до уништување на природната средина, особено на крајбрежјето. Во Саранда се регистрирани случаи на директно фрлање градежен отпад во морето.
Брзиот развој на туризмот има и општествена цена. Цените на недвижностите драстично растат поради зголемениот број странски инвеститори и туристи, што им отежнува на локалните жители да најдат станови по прифатливи цени. Ситуацијата сè повеќе потсетува на она што се случува во пренаселените туристички дестинации како Мајорка.
Кушнер и Иванка инвестираат во луксуз
Албанија се позиционира како сè попопуларна дестинација благодарение на своите песочни плажи, природните убавини како што се Синото око, жичарницата Дајти Експрес и археолошкиот парк Бутринт. Привлекува сè поголем број туристи, вклучувајќи ги и познатите инфлуенсери на социјалните медиуми.
Меѓу инвеститорите се Џаред Кушнер и Иванка Трамп, кои добија зелено светло за изградба на луксузен хотел вреден 1,4 милијарди долари на островот Сазан. Според Светскиот туристички совет, Албанија моментално е третиот најбрзо растечки туристички пазар во светот – веднаш зад Катар и Порторико.
© Vecer.mk, правата за текстот се на редакцијата
