Пратениците на грчкиот парламент денес треба да гласаат за контроверзната реформа со која централно-десничарската влада би вовела можност за 13-часовен работен ден до 37 дена во годината под одредени услови.
Во два наврати, на 1 октомври и вчера, Грција беше делумно парализирана од општ штрајк против тој закон, кој синдикатите го нарекуваат „достоен за средниот век“.
Опозицијата и синдикатите се побунија против оваа мерка што ја застапува министерката за труд и социјална сигурност Ники Керамеус, која предвидува дека за дополнителни 40 проценти од платата, вработените работат до 13 часа на ден за истиот работодавач.
Во таа земја, која се опорави од финансиската криза, но во која економијата е сè уште ранлива, таква можност веќе постои, но само ако вработениот работи за два или повеќе работодавачи, пишува агенцијата Франс Прес.
Сегашното законско работно време во Грција моментално е осум часа, со можност за три часа прекувремена работа.
Синдикати: Ова е влошување на веќе проблематичната ситуација
Се очекува дека само партијата Нова демократија (НД) на премиерот Киријакос Мицотакис, кој е на власт од 2019 година, ќе гласа за новиот закон, но тоа ќе биде доволно за да се усвои реформата бидејќи таа централно-десничарска политичка група има 156 од вкупно 300 претставници во грчкиот парламент.
Мерката би важела само „до 37 дена во годината“ и би била на доброволна основа, нагласува министерката за труд, која тврди дека дискурсот на опозицијата за 13-часовниот работен ден е „неточен и погрешен“.
Керамеус верува дека ова сугерира дека „сите ќе работиме 13 часа на ден во текот на целата година“, изјави таа за телевизијата Скај.
„Дали е тоа вистина? Не е. Ќе биде можно да се работи на овој начин до 37 дена во годината, односно во просек три дена во месецот“, додаде таа.
Вработените во јавниот и приватниот сектор двапати излегоа на улиците за да го осудат она што, според зборовите на Здружението на грчки работници (ГСЕЕ), „понатамошно влошување на веќе длабоко проблематичната ситуација“.
Грците веќе имаат подолго неделно работно време од просекот во ЕУ
Предупредува дека е наивно да се верува дека вработените ќе можат да одбијат да работат 13 часа „со оглед на неурамнотежениот однос помеѓу работодавачот и вработениот“ и влошувањето на „неизвесноста што преовладува на пазарот на трудот“.
Синдикатите, исто така, предупредуваат дека ова ќе го наруши правото на 11-часовен дневен одмор, особено ако се вклучи и времето за патување до работното место.
Во Грција, според Евростат, неделното работно време (39,8 часа) е повисоко од вкупниот просек на Европската Унија (35,8 часа). Грција веќе ја воведе можноста за шестдневна работна недела, особено во случај на голема побарувачка во сектори како што е туризмот.
© Vecer.mk, правата за текстот се на редакцијата
