Контроверзниот бугарски европратеник Андреј Ковачев е задоволен што во извештајот на Европскиот парламент за напредокот на Македонија ќе ги нема термините македонски јазик и идентет. Ваква инфромација денеска објави и бугарската агенција БГНЕС.
Ковачев вели дека овие термини ќе бидат повлечени по барање на пратениците од ЕПП, Зелените и Социјалистите.
„На барање на групата на Европската народна партија, трите најголеми партии во Европскиот парламент - ЕНП, С&Д (социјалистите) и Обновувањето (либералите), синоќа се согласија да ги исфрлат сите референци за „македонски идентитет“ и „македонски јазик“ од нацрт-извештајот за напредокот на Северна Македонија. Очекувам дека следната недела на пленарна седница овој амандман ќе биде поддржан од мнозинството во ЕП.
Темите за идентитетот и јазикот немаат место во извештајот за напредокот на земја што аплицира за членство во ЕУ. Ваквите теми водат само кон разединетост и ја отвораат Пандорината кутија. Ова во овој конкретен случај се потврдува со постојаните појавувања на владетелите во Скопје, а особено на премиерот Мицкоски со неговите манипулации со „вековниот идентитет и јазик“.
Неприкриената цел на властите во Скопјe беше, во пресрет на локалните избори, да покажат некаков неверојатен триумф над „источниот сосед“ и со тоа да објаснат зошто би направиле некои козметички измени во својот устав и делумно би ги вклучиле Бугарите во него.
И покрај невидениот притисок и лобирање, таков преседан не треба да стане дел од извештаите на Европскиот парламент или на која било друга европска институција.
Наместо тоа, РСМ треба да го почитува потпишаниот договор со Бугарија и да ја деблокира работата на историската комисија.
Тоа е местото каде што треба да се дискутираат темите од нашата заедничка историја, како што е напишано во договорот.
Им благодарам на сите мои колеги од сите групи во ЕП, особено на бугарските, за единствениот став по оваа тема!
© Vecer.mk, правата за текстот се на редакцијата
