Според првичните проекции по затворањето на гласачките места, коалицијата „Прогресивна Бугарија“ оствари убедлива победа на денешните предвремени парламентарни избори во Бугарија. Сепак, првите бројки за распределбата на мандатите во новиот состав на Народното собрание сугерираат дека и понатаму ќе биде неопходен сложен коалициски процес за формирање стабилно мнозинство, пренесува Бугарската национална телевизија (БНТ).
Ова беа осми парламентарни избори во последните пет години, на кои граѓаните избираа 240 пратеници за 52. собраниски состав. Долготрајната политичка нестабилност во земјата го става фокусот врз способноста на победничката коалиција да обезбеди поддршка од помалите партии за конечно да се излезе од циклусот на постојани изборни соочувања.
Според податоците на „Алфа рисрч“, „Прогресивна Бугарија“ би освоила 105 пратенички места во 240-члениот парламент. ГЕРБ-СДФ добива 46 мандати, ПП-ДБ – 40, ДПС – 24, Преродба – 14, додека БСП – Обединета левица би имала 11 пратеници.
Слични, но нешто поразлични бројки објави и агенцијата „Мјара“, според кои „Прогресивна Бугарија“ освојува 109 мандати, ГЕРБ-СДФ – 41, ПП-ДБ – 38, ДПС – 26, Преродба – 15 и „БСП – Обединета левица“ – 11.
© Vecer.mk, правата за текстот се на редакцијата
