„Живот на коцка“ е насловот автобиографската книга посветена на животот и работата на естрадниот менаџер Велибор Џаровски – Џаро. Автор на книгата е неговата ќерка, новинарката Милица Џаровскa. Промотор на настанот беше Игор Џамбазов, кој меѓудругото рече: „Мене ми е жал што младиве генерации за Џаро го знаат само по измами и местење натпревари. Ама, дечки, не е така. Тој има направено за оваа држава повеќе од многу политичари. Без разлика на сите приказни што ќе ги прочитате во книгата. Џаро ги донел најголемите балкански ѕвезди во Македонија кои и денес не забораваат да го споменат во своите интервјуа, сеедно дали е Здравко Чолиќ, Бора Чорба, Тереза Кесовија, Мишо Ковач“.
Од неговите скромни почетоци, во семејната куќа во населбата Ѓорче Петров, каде што живее и денес, до неговото издигнување како успешен менаџер, книгата ги носи читателите на возбудливо патување низ животот на Џаро.
„Не беше лесно да се пренесат муабетите на Џаро на хартија“, вели авторката и додава дека кога ја пишувала книгата, ја напишала како да разговара со соговорник, а не со својот татко.
