logo
logo
logo

Благоја Грујовски: Буквално се борев за својот живот, не верував дека вирусот може така да ме покоси!

Vecer | 27.02.2021

Благоја Грујовски: Буквално се борев за својот живот, не верував дека вирусот може така да ме покоси!

Фолк пејачот Благоја Грујовски за "Фокус" ја раскажува својата борба со коронавирусот, при тоа истакнувајќи дека мора да се разбие таа фама околу тоа дека младите го полесно ја прележуваат короната од постарите.

Пред десет дена заврши моето болничко лекување од корона вирус и се вратив дома. За искуството, што да ви кажам, мора да се разбие таа фама дека има правила, дека младите и здрави луѓе лесно го пребродуваат, а на удар се само старите и болните. Од сопствено искуство и од она што го видов на клиника, стереотипот не важи за вирусот – вака ја започнува за ,,Фокус” својата приказна фолк пејачот Благоја Грујовски, кој изминатиот период ја извојува битката за својот живот.

Вели дека веќе бил многу подобар, но јасно му било дека е потребно време се да се среди и да се врати на стариот живот, да го зајакне имунитетот и да продолжи таму, каде болеста го прекинала во чекор.

-Многу лекарства примив, бев хоспитализиран првин на одделение во Осми Септември, а потоа и на клиниката Аџибадем Систина, бидејќи мојата состојба беше крајно сериозна.

Целиот живот сум бил здрав како дрен, не верував дека вирусот може така да ме покоси… Од друга страна пак, мојата мајка која има 82 години, која е со хронично срцево заболување, помина со лесно. Поради годините, би рекол, таа едвај стоеше на нозе, јас одев да ја негувам пред да се инфицираме. Но, за среќа, нејзините симптоми беа лесни. Не знам дали е тоа бидејќи таа целиот живот беше здрава, дури и сега на овие години има добра крвна слика, кој би можел да каже? Поентата ми е дека мора да се разбие фамата, дека ако си млад, лесно ќе заздравиш. Нема тука правила – појаснува Грујовски.

Вели дека на клиника биле хоспитализирани и лица помлади од него, во своите дваесетти и триесетти години, со тешки симптоми.

-И со лекарите разговаравме за тоа, дека ете и науката уште нема одговори. Короната не познава виталност, и сите мора тоа сериозно да го сфатат, бидејќи е непредвидлива болест. Не се важни годините на пациентот, ниту пак во повеќе случаи, хроничните заболувања. Сите сме на удар, мораме да се заштитиме самите себе, како и заедницата. Извојував многу тешка битка, се надевам дека моето искуство ќе придонесе во подигање на јавната свест, дека секому може да му се случи, и што е најважно, нема никакви правила како ќе се одвива болеста. Да бидеме одговорни и внимателни – порача музичарот за Фокус.мк

© Vecer.mk, правата за текстот се на редакцијата

logo

Vecer.mk е прв македонски информативен портал, основан во 2004 година.

2004-2024 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004-2024. Vecer.mk