Министерот Филипче на денешната прес-конференција рече дека за време на новогодишните и божиќните празници треба да бидеме одговорни и да сфатиме дека не смееме да се групираме за да се избегне ширењето на Ковид-19. Порача и дека славењето може да почека, но здравјето не и дека не смееме да дозволиме празнувањето да ни се претвори во лош спомен.

– Комисијата предложи нови мерки, скратување на работното време до 18 часот, забрана за организирање на новогодишни настани од општините, работните организации, верските заедници, а останува и препораката да нема собирање дома и по викендичките, да не се излегува од дома по 18 часот освен ако не е неопходно, порача Филипче и додаде дека состојбата со корона вирусот е стабилна, но има голем број заболени и хоспитализирани.

– Состојбата со короната е стабилна, но и натаму е многу критична со оглед на бројот на заболени и хоспитализирани. Слободни кревети има во континуитет, а факторот на преносливост е под еден по извесен период. Но, тоа не треба да не опушти и не смееме да си дозволиме еден поинаков пристап доведе до влошување на ситуацијата, истакна денеска министерот за здравство Венко Филипче, кој заедно со премиерот Зоран Заев порачаа годинава одговорно да се празнува.

На заедничката прес-конференција на која ја промовираа кампањата „Празнувај одговорно“, министерот Филипче соопшти дека во просек минатата недела се лекувале 1300-1400 пациенти и оти бројот на слободни болнички кревети е константен и има околу 150 на ниво на држава секој ден.

Со цел да не ескалира состојбата, новите мерки на Комисијата за заразни болести се ограничување на работата на угостителските објекти до 18 часот, забрана за организирање новогодишни настани на плоштадите, забрана за организирање предновогодишни прослави од страна на компаниите, укажување на верските заедници да не повикуваат на масовни собири за време на престојните верски празници. Останува и препораката да нема собири дома и во викендичките и се апелира до граѓаните да го ограничат движењето по 18 часот доколку немаат неодложна потреба.

– Ова е еден сериозен сегмент кој останува на свеста на граѓаните. За жал, нема друг механизам и не може да следи забрана тука бидејќи интегритетот на домот е загарантиран со Уставот. Потребно е сите заедно да бидеме одговорни за важноста на овие мерки и да не дозволиме убавите мигови во семејството да се претворат во лоши спомени. Овој празничен период да прославиме одговорно, да ги почитуваме мерките и да мислиме на своето и на здравјето на нашите најблиски. Славењето може да почека, здравјето не, порача Филипче.

На денешната прес-конференција тој информираше дека во фаза на поставување се и модуларните болници. Во Гевгелија веќе е завршена инсталацијата, а следува поставувањето во Штип, Битола, Струга, Кичево, Струмица.