Албанскиот премиер доцна синоќа на својот официјален Фејсбук профил објави слика од Македонија, поточно од Кривошијска река на Шар Планина и пределот познат како Лешница, претставувајќи го како една од убавините во Албанија.

„Преубавата Албанија. Кањонот на Лешница“, напиша Рама на својот ФБ профил и постави фотографија од прекрасните водопади на реката Лешница на Шар Планина.

По ова социјалните мрежи се разгореа, а многумина и под фотографијата започнаа да го критикуваат и да му упатуваат жестоки коментари на албанскиот премиер.

Граѓаните бараат македонската влада да реагира и да испрати протестна нота. Според граѓаните владата и МНР мора да покажат достоинство и да реагираат на овој чин на Еди Рама.

Пределот Лешница е познато дека поради големиот надолжен пад, долж течението на Кривошијска Река се јавуваат повеќе водопади и еден слап.

Така, околу 1 километар низводно од извориштето е првиот покарактеристичен водопад кој се нарекува Кривошијски водопад или Горно Цкало. Интересно е што без оглед на релативно малиот протек, водната завеса преку карпата е широка 2-3 метри и се распрснува во бројни ситни капки кон подножјето. Овде, глетката е навистина импресивна, посебно кога ќе се забележи водопадското виножито.

Инаку, во карпестите маси странично од водопадот има две поткапини длабоки по десетина метри во кои може да се засолните при лошо време.