Лидерката на францускиот екстремно десничарски Национален фронт (ФН), Марин Ле Пен, ја нарече ЕУ „тоталитарна” и побара во секоја земја членка на Унијата да се организира референдум, како оној што утре ќе се одржи во Велика Британија.

Ле Пен, која е член на Европскиот парламент, се определи како „заштитник на слободата на народите да располагаат со својата слобода и да ги избираат законите”.

– Она што го сакам е референдум во Франција. Секоја земја треба да може да се произнесе со референдум, истакна Ле Пен.

– Французите не се прашани од пред 11 години, а последниот пат нивниот збор беше погазен, од традиционалните левичарски и десничарски партии, нагласи лидерката на ФН, алудирајќи на референдумот од 2005 година, со кој Французите го отфрлија за Договорот за еврпскиот устав.

– Какви и да се резултатите в четврток, ЕУ се распаѓа, распукува насекаде. Или чекаме пропаст, експлозија или ќе седнеме на маса и ќе започнеме да градиме Европа на нациите, која ќе ја замени тоталитарната ЕУ, која ја знаеме денес, додаде Марин Ле Пен.