Курдски екстремисти истрелале четири ракети врз аеродромот во турскиот град Дијабекир, во југоисточниот дел од земјата, поради што патниците и персоналот биле веднаш евакуирани.

– Во нападот нема жртви, ниту повредени, а возниот ред на летовите не е нарушен, изјави гувернерот на Дијабекир, Хусеин Аксој.

Ракетите паднале во празен простор во близина на полициски контролен пункт на аеродромот, предизвикувајќи експлозии кои се слушнале во целиот град.

На местото на инцидентот веднаш пристигнала полиција.

Во Дијабекир живее големо курдско малцинство. Нападот е извршен само неколку дена по почетокот на турската воена офанзива во Сирија, која има за цел да ја уништи Исламска држава и да ги спречи курдските борци да заземат територии.