На Клиниката за трауматологија во Скопје за првпат се извршени два минимално инвазивни хируршки зафати на предниот вкрстен лигамент на коленото, при кои не е направено класично отворање за санација на промените и вградување ”штрафови” кои ја фиксираат потколеницата. Двајцата пациентите, кај кои завчера е применет овој оперативен метод, се во одлична состојба, а Клиниката е подготвена да продолжи со овие интервенции за кои досега се патуваше во странство. Оперативниот зафат е познат како артроскопска лигаментопластика на предниот вкрстен лигамент на коленото, а го изврши медицински тим предводен од шефот на Одделот за артроскопија, Зоран Андоновски, заедно со д-р Игор Кафтанџиев и д-р Кристијан Костов. Интревенцијата се правеше под стручна асистенција на д-р Марко Кадија од Клиничкиот центарот во Белград, СЦГ.
Според директорот на Трауматолигија проф. д-р Јордан Савевски, пациентите побрзо заздравуваат по ваквите интервенции, зафатот е полесен, остава помали лузни, не е потребна имобилизиација. Веќе наредниот ден оперираниот застанува на нозе, а рехабилитацијата е побрза и поефикасна. Ваквите повреди на коленото најчесто се јавуваат кај спортисти.