Речиси 73.000 компании во Италија го прекинале работењето поради пандемијата, покажува истражувањето на италијанскиот завод за статистика „Истат“.

„Истат“ го спровел истражувањето меѓу нешто повеќе од милион компании во периодот од 23 октомври до 16 ноември, се вели во соопштението. Се работи за компании од секторите индустрија, градежништво, трговија и другите услужни сектори.

Бројката од скоро 73.000 чини приближно седум проценти од вкупниот број анкетирани компании. Од таа бројка, приближно 55.000 компании очекуваат повторно да започнат со работа во иднина, додека речиси 17.500 се засекогаш затворени.

Истражувањето на „Истат“ понатаму покажа дека нешто повеќе од 700.000 компании работат нормално, додека скоро 244.000 се делумно отворени.

Огромен дел или 85 проценти од затворените фирми, се мали компании со помалку од девет вработени. Обично се работи за спортски центри, мали хотели, продавници и обложувалници.

„Истат“ објави дека во периодот од јуни до октомври, повеќе од две третини од компаниите пријавиле пад на прометот во споредба со истиот период минатата година, а дополнителни загуби во периодот од декември до февруари се очекуваат за 61,5 проценти од нив.

извор: Makfax