Повеќе од половина од 66 новолиценцирани доктори на медицина изразиле желба да работат со ковид пациенти. Ова било истакнато на средбата на министерот за здравство Венко Филипче, и заменик министерот, д-р Арменд Арслани кои се сретнале со докторите на медицина, кои месецов го положија стручниот испит и добија лиценца за работа од Лекарската комора на Македонија.

На средбата младите доктори ја поздравија измената на Законот за здравствена заштита од јануари, минатата година, со која се овозможи секој дипломиран доктор кој се стекнал со лиценца веднаш да почне со шестмесечна пракса за која првпат добиваат надомест од 30,000 денари месечно, соопштија од Министерството за здравство.

Работата во траење од шест месеци се спроведува во јавните здравствени установи – здравствени домови и општи болници со проширена дејност што вршат дејности и на примарна здравствена заштита, во дејностите на итна медицинска помош и домашно лекување, превентивна здравствена заштита за предучилишни и училишни деца и поливалентна патронажа.