Македонскиот машки ракометен првак Вардар на стартот во новата сезона во “А” групата во Лигата на шампионите, на гостувањето во Барселона против истоимениот шпански гигант, иако загуби со 31:22 (16:12), не се посрамоти. Напротив, вардарците во текот на сите 60 минути воопшто не ја респектираа големата Барса, составена од врвни европски интернационалци. Дури во поголем дел од првото полувреме беа и рамноправен противник, головите ги постигнуваа од вдахновени акции, повеќ ето од шест метри. Ако на голот на Барса не беше расположениот Периќ, можеби, крајниот исход ќе беше и поинаков. Поразот ќе беше помал. Централна фигура во вардаровиот состав беше Иве Марковски, кој за шпанската одбрана и за Периќ и за Беруфет беше нерешлива загатка. Тој, 11 пати ја погоди мрежата на Шпанците, а ако во самиот финиш, при резултат 30:22 од седум метри не ја погодеше гредата на голот на Периќ, предноста на Барса ќе беше само седум голови. Вака, во последната секунда Ромера поентираше и на крајот 31:22. Следен противник на Вардар, в недела во “Кале” ќе биде унгарскиот ПИК Сегед. Во вториот натпревар од “А” групата, ПИК Сегед го совлада романскиот тим Констанца со 27:24.