Државната изборна комисија информира дека денеска беше одржана свечена седница на која беа поделени уверенијата за избраните пратеници, согласно резултатите од предвремените парламентарни избори.

„На свечената седница, беа подигнати уверенијата на избраните пратеници од Коалицијата Можеме, ВМРО-ДПМНЕ и Коалицијата Обнова на Македонија, како и Демократската Унија за Интеграција“, соопштија од ДИК.

Од таму додаваат дека по завршување на свечената седница, во просториите на Комисијата, уверенијата за избраните пратеници на Коалицијата Алијанса за Албанците и Алтернатива, биле подигнати од страна на нивниот овластен претставник.

Уверенијата за избраните пратеници на политичката партија Левица и уверението за избран пратеник на Демократската партија на Албанците – ДПА, сè уште не се врачени. Истите ќе се врачат во понеделник кога или избраните пратеници или овластени лица од страна на наведените политички партии ќе ги подигнат од Државната изборна комисија.

извор: Makfax