Ќе се воведе задолжителен негативен ПЦР тест за влез во Австрија на лица кои престојувале во таканаречените земји со висок ризик, во кои спаѓаат сите земји од Западен Балкан, беше објавено попладнево на прес-конференцијата на австриската влада.

Од петок, канцеларот Себастијан Курц најави построги контроли на австриските граници и дека од тогаш ќе може да се влезе во Австрија, од региони со висок ризик, само со негативен тест за ПЦР.

„Мерките што ги преземаме се насочени кон спречување на натамошно ширење на коронавирусот. Кога ќе ги разгледаме сегашните кластери, можеме да видиме дека имаме проблем со увоз на вирусот, пред се од Западен Балкан“, објасни тој на прес-конференција.

Курц рече дека Австрија ги исцрпила сите нивоа предупредувања за патувања, апелираше до граѓаните да се откажат од патувањето во ризични региони и дека веќе постои обврска за самоизолација при враќањето од такви делови на светот.

„Сепак, сè уште имаме премногу увезени случаи. Затоа ќе биде потребен негативен ПЦР тест за влез во Австрија, а ќе контролираме и построго почитување на карантинските мерки“, подвлече тој.

Што се однесува до ПЦР тестовите, тој вели дека ќе бидат прифатени само оние од овластени лаборатории.

„Откажете се од патувањето во Западен Балкан ова лето. Ја разбирам поврзаноста и блискоста со тој регион. Тој регион е исто така многу блиску до моето срце“, додаде Курц.