Сопствениците на “Македонски телекомуникации” на вчерашната седница на Бордот начелно се договориле значителен дел од средствата, наменети за консултантски услуги за годинава, да бидат пренасочени за ангажирање на домашни експерти, а помал дел за странски. Досега, сите средства за консултантски услуги беа изнесувани надвор од земјава преку “Телемакедонија”, фирмата-ќерка на унгарски “Матав”, чиј договор е продолжен со променети услови. Токму “Телемакедонија” беше посочувана како фирма преку која во последниве две години на странските директори во Телеком и “Мобимак”, но и други “експерти” само за консултантски услуги годишно им се исплаќаа нелогично големи надоместоци на име “трансфер на искуство и знаење” во висина од седум милиони евра. Поради тоа имаше сомневања дека тоа е еден од каналите “Матав” да го изнесува профитот од Телеком од земјава. Инаку, членовите на Бордот искажале задоволство од финансиските резултати остварени лани не само во Телеком, туку и во “Мобимак”, при што над 60 милиони евра биле вложени во развој на инфраструктурата. Во бизнис-планот за оваа година е побаран поагресивен настап во промоцијата на брзиот интернет АДСЛ. На седницата на Бордот наименуван е нов финансов директор на “Мобимак”, Дејан Крстевски, кој го заменува унгарецот Петер Конц. Спорните прашања околу отпуштањата, испратнините, новите вработувања, цените на услугите и дивидендата се оставени да ги договрат првиот човек на Матав, Елек Штрауб и премиерот Бучковски на средбата што ќе се одржи меѓу 20 и 25 овој месец.


С. Блажевска