Во првиот натпревар откако Шекил О’Нил ги напушти Л.А. Лејкерси екипата не се прослави. На 8,53 минути до крајот на третата четвртина “езерџиите” имаа предност (52:38), но тогаш Сиетл Соникс направи скор од 22:5 и со свирежот на сирената на семафорот дури дојде и во водство 60:57. На крајот Сиетл славеше – 87:80. Најефикасен кај победниците беше Реј Ален со 25 поени, а кај поразените Коби Брајант со 35 кошеви. Екипата на Орландо Меџик во првиот подготвителен натпревар за почетокот во НБА лигата загуби од Мемфис Гризлис со 95:99. Во победничкиот состав дури петмина кошаркари постигнаа двоцифрен број на ко- шеви, а најефикасни беа Стромил Свифт (16 поени) и По Гасол ( 12 поени и 10 скокови). На спротивната страна блескаа Мабли (24) и Френсиси (19 кошеви, 7 скокови и асистенции). Грент Хил се врати по подолга пауза, но не одигра добро. За 16 минути игра постигна само два поена. Тимот на Филаделфија славеше против Визардси – 114:107. Мерк Џексон (21 поен, 6 скокови) и Ален Ајверсон (16) го предводеа тимот на Филаделфија, а во редовите на гостите најефикасен беше Хејс со 23 поени и по пет украдени топки и скокови. Бостон Селтикс со 30 поени предност го совлада Чикаго Булс (104:74), а најефикасни беа Пол Пирс (18) и Рики Дејвис (15). Новопечениот член на Селтикс, Гери Пејтон, додаде десет кошеви и шест асистенции.