Официјална грчка црвена линија за сложено име со географска одредница не ужива целосна поддршка во грчкото општество. Солунскиот митрополит Антимос, од неделната литургија во Солун порача дека немало простор за компромис со името Македонија, со предупредување да не се прифаќа сложено име за нашата земја. На литургијата присуствувал и лидерот на Независни Грци, Панос Каменос, кој ја обвинил владата на Антонис Самарас дека го давала она што било свето за народот, пренесе Нетпрес.

– Пред Господ и пред народот му одговарам на Неговата Светост дека Независни Грци гарантираат дека ниту Самарас, ниту Венизелос, ниту пак Ципрас ќе го преговарааат името на Македонија. Македонија е грчка и не прифаќаме географска одредница. Независни Грци го делат ставот на Неговата Светост и на грчката црква, порачал Каменос од Солун по средбата со Антимос.

Со ова тој всушност ја реафирмираше веќе позната позиција на неговата партија која што е против решение со сложено име со географска одредница што ќе го содржи терминот Македонија. Зад оваа позција во минатото цврсто стоеше и актуелниот премиер Самарас, но останува нејасно дали сега за него е прифатливо компромисното име да го содржи терминот Македонија, како што се претставува во рамките на официјалната грчка црвена линија, пишува Нетпрес. Самарас не одговори на ниту едно од девет пратенички прашања на Каменос за тоа дали за него сега, за разлика од порано, е прифатливо компромисното име да го содржи и терминот Македонија.

Каменос веќе најави дека неговата партија нема да гласа на престојниот избор за нов претседател на земјата. Со тоа се поизвесно е дека поради немањето доволно гласови за избор на претседател, во Грција ќе се распишат предвремени парламентарни избори. Според тоа, не изненадува фактот што проблемот што Атина го има со нашето уставно и историско име овие денови е се по актуелно во меѓу-партиските препукувања.

– Сега е јасно дека грчкиот народ бара избори. Не можеме да им го дадеме името Македонија, давајќи и продолжен живот на Владата која што му даде отворен мандат на Нимиц за името Северна Македонија за Скопје, изјави Каменос.