Kандидатот за премиер на ДУИ, Насер Зибери, кажа дека во неговата програма има 25 мерки со кои, како што кажа, ќе се подобри животот на сите граѓани, не само на Албанците.

„Пред една недела, го презентирав мојот акционен план за моите први 100 дена како прв премиер Албанец, тука на истото место, пред зградата на Владата. Дваесет и пет конкретни мерки што ќе ги спроведам со најголем приоритет од првиот ден на функцијата. Дваесет и пет конкретни мерки, со кои ќе се подобри животот на сите граѓани, не само на Албанците“, рече Зибери.

Тој кажа дека со неговиот план за еднаква економска преродба ќе создаде илјадници нови работни места и ќе се постигне еднаквост и во приватните компании.

„Данокот нула на приход за вработените под 35-годишна возраст ќе ги зголеми платите, но исто така ќе ги мотивира компаниите да вработуваат млади. Државниот придонес од 50 проценти од социјалниот придонес на новите вработувања, кои што ја зголемуваат еднаквата застапеност, ќе создаде работни места, особено за Албанците, и ќе ги отстрани етничките бариери. Со грантовите од 20.000 евра за млади земјоделци, ќе се подржи земјоделството како еден од најважните столбови на нашата економија“, рече Зибери.

Меѓу другото тој ја потенцираше исто така и заложбата за обезбедување 20.000 евра државен заем за купување на прв дом, со цел младите да ја изградат нивната иднина во оваа држава. „Ќе обезбедиме за секое семејство во оваа држава да има барем еден вработен и сигурен приход“, кажа Зибери.

Вети социјални пензии за сите жени, кои никогаш официјално не работеле, но, како што кажа, придонеле многу во градењето на нашата држава и нашето општество.

извор: Makfax