Премиерот Зоран Заев не сака да прејудицира како ќе гласа Собранието во случај да нема цензус за претстојниот референдум за договорот за името, но повтори дека е убеден во исполнување на цензусот, посочувајќи дека нема алтернатива за тоа во кој правец ќе се движи државата.

„Парламентот ќе носи самостојна одлука”, рече Заев одговарајќи на новинарски прашања по денешната прес-конференција во Владата за доделување финансиска државна помош на компаниите.

Ако граѓаните не донесат одлука, посочи премиерот, тогаш понатаму продолжуваатинституциите. Од тој аспект не преједуцирам како ќе гласа Парламентот, може сите 120 пратеници да гласаат „за” или „против”, сите да гласаат „за” или да бидат поделени. Тоа е процес кој треба да го следиме, рече Заев, дополнувајќи дека е убеден оти ќе има цензус и дека огромното мнозинство ќе гласаат „за”, затоа што не може да се постигне подобар договор со Грција.

„Имаме одлична и неповторлива можност која треба да ја искористиме. Ние политичарите нашето го направивме и одлуките ги донесовме незнаејќи како ќе излеземе од овој процес. Како премиер имам мандат до декември 2020, овој мандат може да заврши на 30 септември, но јас сум тука да носам одлуки. Јас ја донесов одлуката и благодарен сум што Владата и парламентарното мнозинство ја поддржуваат оваа одлука. Сите наши одлуки се донесени за тоа што е заедничко очекување на граѓаните”, рече Заев.

Тој порача дека на референдумот еднаква одговорност и право на глас за да се одлучи во кој правец ќе оди државата имаат и тој како премиер, и лидерот на опозициската ВМРО-ДПМНЕ Христијан Мицкоски и сите граѓани.

Фото: ФБ Зоран Заев