Според извештаите што пристигнуваат од Саудиска Арабија, напаѓачот на Барселона Самуел Ето ќе настапува како позајмен фудбалер за шампионот на Азија, Ал Итихад. “Не играм само за пари. Среќата ми е приоритет во животот, поради неа прифатив да играм за Итихад во АФЦ- лигата на шампиони”, изјави репрезентативецот на Камерун на прес-конференцијата што се одржа во Једах. Договорот предвидува тримесечна позајмица на Ето, кој е обврзан да настапува за новиот тим во четвртфиналето на азиската Лига на шампиони, што е на програма во септември, како и за време на одржувањето на Клупското светско првенство во декември, во случај неговиот нов тим да се квалификува. Претседателот на Итихад, Мансор Ал-Балави најпосле успеа да си ја исполни животната желба, да потпише со Самуел Ето и да донесе квалитетно засилување за својот клуб.
Сепак, оваа вест треба да се земе со задршка, бидејќи неколку пати Ал-Балави имаше најавувано дека ќе донесе во клубот некоја голема ѕвезда, за на крајот се да биде само пусто ветување.