Од Авалон продукција велат дека станува збор за историски концерт затоа што во Македонија доаѓа пејач од А-листата на светски изведувачи, но и суперексклузивен бидејќи капацитетот на салата е убедливо најмал од сите простори на кои Енрике настапувал во изминатите 10 години низ светот. Имено, пуштени се нешто повеќе од 8.000 билети во продажба.

Инаку, светската поп ѕвезда доаѓа овој месец специјално во Македонија, со оглед дека во мај месец во регионот веќе одржа концерти во Белград, Загреб и во Софија.

Енрике немал посебни барања во однос на сместувањето и храната, но инстирал повеќе на технички аспекти за организацијата на концертот. Предгрупа нема да има, а вратите на арената ќе бидат отворени еден час пред концертот кој треба да почне во 21 часот.

На концертот ќе биде промовиран неговиот последен студиски албум, а Енрике ќе ги изведе и неговите добро познати хитови како Bailando, El Perdon, Not in Love, Hero, Tonight, Bailamos…

Кралот на латино-поп музиката, како што го нарекуваат медиумите, досега има продадено над 140 милиони албуми во светот и е единствениот музички уметник кој дури 13 пати бил на првото место на Bilboard dance листата. Соработувал со бројни светски ѕвезди, а добитник е и на повеќе значајни награди меѓу кои “Греми”, „Билборд” и „Американ Мјузик Авард”.

Веќе утре повторно во организација на Авалон во Скопје ќе настапи и Џон Њуман, големо светско име на соул музиката.