Во Собранието на Република Македонија денеска од страна на Единствена Македонија беше доставен Предлог – закон за амнестија за настаните од 27 април, минатата години.

– Денеска во Собранието го доставуваме предлог-законот за амнестија и до пратеничката група на ВМРО-ДПМНЕ, посочи Драган Угриноски, членот на Извршниот комитет на Единствена Македонија и претседател на МЗП Тврдокорни изразувајќи очекување дека, пратениците на ВМРО-ДПМНЕ ќе ја започнат законодавната постапка бидејќи, според него, Деловникот тоа го дозволува на секој пратеник.

Тој наведе дека, со законот се бара целосно ослободување од кривичен прогон и запирање на постапките поради несправедливоста и апсурдноста да се гонат уставобранителите кои влегоа во Собранието на 27 април со силна верба во одбрана на уставниот поредок. Изрази очекување дека законот ќе биде изгласан од сите пратеници.

– Очекуваме од пратениците и нивните лидери да покажат државнички капацитет и силно лидерство со кое ќе го израдуваат народот и ќе дојде до надминување на поделеноста меѓу граѓаните и партиите, нагласи Угриноски.

Единствена Македонија на 22 мај, 20 јули и 11 август 2017 година поднесе во Собранието Иницијатива за донесување на Закон за амнестија на граѓаните учесници во настаните на 27 април 2017 година во Собранието на Република Мекедонија, по скратена постапка.