Ешли Пол Грифит (47), кој важи за еден од најлошите педофили во историјата на Австралија, признал 307 напади кои ги извршил во центрите за згрижување деца во Квинсленд и во Европа меѓу 2003 и 2022 година. Неговите жртви биле на возраст од една до седум години.
Судијата рече дека обемот и природата на злосторствата извршени од Грифит се ужасни и рече дека имало „ужасно нарушување на довербата“. Покрај овој случај, според Би-би-си, Грифит е обвинет за злоупотреба на повеќе од 20 деца во Нов Јужен Велс и Италија.
Во Окружниот суд во Бризбејн денеска, судијата рече дека постои висок ризик од повторно прекршување во случајот на Грифит - за кого судот слушна дека има „педофилско нарушување“ - и наредил период без условно ослободување од најмалку 27 години.
Грифит првпат бил уапсен од австралиската федерална полиција во август 2022 година, а една година подоцна е обвинет за повеќе од 1.600 сексуални престапи. Повеќето од нив на крајот биле отфрлени.
Инспекторите пронашле илјадници фотографии и видеа од насилствата, кои Грифит ги направил и потоа ги објавил на темната мрежа. Иако лицата биле исечени од снимките, инспекторите успеале да ги поврзат со Грифит благодарение на уникатната постелнина, која можела да се види во позадината на некои од снимките. Предметната постелнина била направена специјално за Детскиот центар во Квинсленд.
Грифит признал 28 точки за силување, околу 200 точки за несоодветно однесување кон дете и неколку други обвиненија поврзани со создавање и дистрибуција на педофилска содржина.
Четирите девојчиња идентификувани во видеата на Грифит се од Детскиот центар во Пиза, Италија. Останатите 65 жртви биле од 11 локации низ Бризбејн.
Пред изрекувањето на пресудата, судот слушнал низа емотивни изјави од некои од тие жртви и нивните родители, кои не можат да се идентификуваат од правни причини. Меѓу нив имало и две сестри кои биле малтретирани во градинка, од кои едната се сеќава дека Грифит ѝ бил омилен воспитувач.
„Кога открив што навистина направил беше поразително... Се чини дека не можам да го обработам тоа дури и сега бидејќи постои прекин помеѓу она што го паметам и реалноста“, рече таа, пренесува Дејли Меил.
Друга девојка раскажала како со постапките на Грифит ѝ го одзел нормалното детство и истакнала дека со години има психички проблеми.
„Никогаш нема да знам каков би можел да биде мојот живот. Никогаш нема да знам дали можев да пораснам во личност која нема да се плаши од луѓето“, рекла жртвата, пренесува Guardian Australia.
Родителите зборувале низ што поминале кога дознале за страшното насилство што го доживеале нивните деца. Неколку рекле дека не можат да си простат што му верувале на Грифит.
„Мојата ќерка те сакаше како да си ѝ вујко и ја користеше како играчка“, рекол еден родител, додека друг рекол дека не може ништо да направи за „да го поправи она што Грифит го направи со телото на неговата ќерка“.
Многумина надвор од судот ги повикаа властите да спроведат истрага против детските центри и пошироко, бидејќи никому не му е јасно како Грифит успеал толку долго да прави злосторства без да биде откриен.
© Vecer.mk, правата за текстот се на редакцијата
