Брзината на електричните тротинети во Париз е намалена на 10 km/h во делови од центарот на градот според новите правила воведени од три големи компании за изнајмување во ноември.

Според локалниот весник Le Parisien, ова се однесува на области каде што електричните тротинети и пешаците се на ист пат, како што се туристичките атракции, парковите, училиштата и плоштадите.

На иницијатива на градската управа, намалените брзини веќе се тестирани во Музејот Лувр и на некои други плоштади. Сега компаниите што изнајмуваат 15.000 електрични тротинети во Париз одлучија да ги прошират своите таканаречени „бавни зони“.

Тротинетите автоматски ќе ја намалуваат брзината на возење откако возачот ќе влезе во одредена област и ГПС – тракерот на тротинетот ќе ја регистрира нивната локација.

Корисниците можат да ги видат „бавните“ области во апликациите на компаниите за изнајмување. Сопствениците на приватни тротинети засега можат да возат со максимална дозволена брзина.

Иако напорите на Париз се меѓу најдалекусежните и ќе ги погодат туристите, тој не е првиот град што воведува такви гео-ограничувања за електричните тротинети.

Њујорк, Барселона и Берлин имаат ограничени брзини во одредени области.

Некои париски предградија, исто така, веќе имаат такво ограничување, додека компаниите за изнајмување електрични тротинети во многу градови исто така поставуваат ограничувања каде може да се паркираат тротинетиза да се спречат да ги пренатрупаат парковите и преполните места.

Француските служби за изнајмување велат дека нивните бавни зони би можеле дополнително да се прилагодат на барање на градската администрација.

Париските власти се уште не се задоволни од овој доброволен чекор на давателите на услуги. Како што изјави Дејвид Белијард, советник за мобилност во париското градско собрание, за Le Parisien, бреговите на Сена и многу посетените трговски области сè уште не се опфатени со ограничувањето на брзината.

Со оглед на големиот број несреќи со тротинети во Париз (329 возачи се повредени, а двајца загинаа само оваа година), градот размислува и да ги забрани тротинетите на одредени локации или нивната употреба на две или три лица истовремено.

Во меѓувреме, за да се зголеми безбедноста, три компании за изнајмување во Париз одлучија да воведат „програма за почетници“ која ја ограничува брзината на тротинетите  на максимални 15 km/h.

Овој режим може да го постават луѓе кои користат тротинет за прв пат и не се чувствуваат безбедно.