Во Германија се потврдени 29.426 нови случаи на заразени со коронавирус што е најголемо дневно зголемување од 8 јануари, додека владата сака да воведе поостри мерки за спречување на третиот бран на пандемијата, пишуваат германските медиуми.
Седумдневниот просечен број на новозаразени на 100.000 жители се искачи на 160,1, според податоците на институтот за инфективни болести „Роберт Кох“.
Германија се бори со таков вид на коронавирус кој се шири побрзо, и тоа пет месеци пред парламентарните избори на кои се очекува помала поддршка за владејачките конзервативци на Ангела Меркел отколку на претходните избори.
Канцеларката Меркел посакува парламентот привремено да и додели на сојузната влада можност за воведување блокада во области со голем број на заразени лица, бидејќи некои региони не сакаат да воведат построги ограничувања.
Вицеканцеларот Олаф Шолц во четвртокот ги бранеше измените на Законот за заштита на болести, кои вклучуваат воведување полициски час кога седумдневната инциденца го надминува бројот на сто случаи на 100.000 жители.
„Ова помогна насекаде, тоа беше направено во многу земји низ светот и ја намали стапката на инциденца“, рече тој, додавајќи дека треба да се стори нешто за да се ограничи ширењето на вирусот.
„Ние сакаме да имаме строги правила“, истакна Шолц.
makfax.com.mk
