Мораме да им помогнеме на Украинците, изјави генералниот секретар на НАТО Јенс Столтенберг денеска на почетокот на состанокот на министрите за надворешни работи на земјите-члени на Алијансата, што се одржува во Букурешт.
Столтенберг вторпат во текот на денот посочи дека НАТО не е дел од конфликтот, но ќе ја поддржи Украина онолку колку што е потребно и ќе ја брани секоја педа од нејзината територија.
– Руската војна ја загрози евроатлантската безбедност и предизвика страдање на Украинците, предизвика енергетска и прехранбена криза на глобално ниво. Затоа, да и помогнеме на Украина да се одбрани, истакна претседателот на Романија, Клаус Јоханис.
Тој додаде дека НАТО треба да ги спроведе одлуките од Мадрид, особено оние поврзани со Црно Море и источното крило на Северноатлантската алијанса.
Состанокот на министрите за надворешни работи на НАТО во Букурешт продолжува зад затворени врати. Сесијата се одржува со учество на Финска и Шведска, кои имаат статус на земји поканети официјално да се приклучат на организацијата.
