logo
logo
logo

(Видео) ООН започнува истрага за принцезата Латифа, Лондон бара доказ дека е жива

Vecer | 17.02.2021

(Видео) ООН започнува истрага за принцезата Латифа, Лондон бара доказ дека е жива


Обединетите нации ќе започнат истрага за принцезата Латифа, ќерка на владетелот на Дубаи, која го обвини нејзиниот татко дека ја држи во заложништво од 2018 година, кога се обиде да избега од Обединетите Арапски Емирати.

Канцеларијата на Високиот комесаријат на ООН за човекови права предлага Обединетите Арапски Емирати да бидат истражени за притворот и условите во кои живее принцезата.

Британското Министерство за надворешни работи изјави дека станува збор за загрижувачки случај и побара доказ дека Латифа е жива.

„Со оглед на тоа што го видовме, луѓето би сакале да видат дека е жива и здрава“, рече британскиот министер за надворешни работи Доминик Раб.

Тој изјави дека Велика Британија не избегнува одговорност во вакви чувствителни случаи и кога се загрозени човековите права.

„Не е едноставно да се каже дека можеме да воведеме санкции. Постои многу строг законски праг“, рече Раб, пренесува „Ројтерс“.

Триесет и петгодишната Шеика Латифа во видеоснимката емитувана на телевизијата Би-би-си изјави: „Јас сум заложник, а оваа вила е претворена во затвор“.

Шеика Латифа рече дека видеото го снимила во бањата, бидејќи тоа е единствената просторија каде што може да се заклучи и дека сите прозорци на зградата се блокирани, па затоа не може да ги отвори.

Таткото на Латифа, шеикот Мохамед бин Рашид Ал Мактум, е еден од најбогатите шефови на држави во светот, владетел на Дубаи и потпретседател на Обединетите Арапски Емирати (ОАЕ).

Принцезата не се согласува со кралското семејство и повеќепати ја повикуваше јавноста да покрене демократски реформи и да се залага за поголеми права на жените.

 


makfax.com.mk

© Vecer.mk, правата за текстот се на редакцијата

logo

Vecer.mk е прв македонски информативен портал, основан во 2004 година.

2004-2024 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004-2024. Vecer.mk