Украина забрани употреба на руската вакцина против коронавирусот „Спутник В“ на нејзината територија, со образложение дека во земјата не може да се дистрибуира ниту една вакцина произведена од држава агресор, пренесува „Гардијан“.

Овој потег доаѓа во време кога Европската унија ја разгледува можноста за одобрување на руската вакцина, а во студија во престижното медицинско списание „Лансет“ објавено е дека нејзината ефикасност е 91,6 проценти.

Британскиот весник потсетува дека Унгарија, која е членка на ЕУ, веќе одобри употреба на „Спутник В“.

Киев, кој е во конфликт со Москва поради анексијата на Крим во 2014 година и поддршката на Русија за сепаратистите во источна Украина, повеќепати најавуваше дека ќе ја блокира употребата на руски вакцини.

Претседателот на Украина, Володимир Зеленски, рече дека земјата ќе користи само вакцини од водечки производители.

Според некои извештаи, Русија им обезбедува вакцини на проруските приврзаници во источна Украина, додека Киев се бори да обезбеди вакцини од други добавувачи, пишува „Гардијан“.

makfax.com.mk