На лондонската берза цената на барелот по пладне беше повисока за 31 цент од вчерашното затворање на тргувањето и изнесуваше 76,70 долари. На американскиот пазар барелот се тргуваше по 40 центи повисока цена, по 72,14 долари. Цените беа зголемени оваа недела со најавата на Саудиска Арабија дека во јули ќе го намали производството за еден милион барели дневно, на девет милиони барели дневно.
„Како што сега стојат работите, нафтениот пазар е на работ на огромен недостиг од понудата. Дополнително намалување на производството во Саудиска Арабија, според некои проценки, би требало да го зголеми дефицитот на понудата на пазарот во јули на повеќе од три милиони барели дневно“, рече Аналитичарот на PVM Oil, Стивен Бренок.
Така, трговците повторно се фокусираа на саудиската објава и цените се стабилизираа по падот утринава, што беше поттикнат од слабите кинески трговски податоци и зголемените залихи на гориво во САД. Кинескиот извоз падна за 7,5 отсто во мај, а увозот исто така се намали за 4,5 отсто, што сигнализира дека домашната побарувачка е сè уште посилна од странската побарувачка.
Податоците покажаа и силен пораст на увозот на сурова нафта, бидејќи рафинериите почнаа да ги „здебелуваат“ залихите. Белешка од американската инвестициска банка JP Morgan покажа дека кинеската побарувачка е подобро „покриена“, што доведе до заклучок дека рафинериите не ја зголемиле преработката.
Во САД резервите на бензин се зголемија минатата недела за околу 2,4 милиони барели, а залихите на деривати за околу 4,5 милиони барели, објавија во вторник берзански извори, цитирајќи го извештајот на Американскиот институт за нафта (API).
Неочекуваното зголемување на залихите на гориво поттикна загриженост за потрошувачката, особено кога побарувачката за патувања за Денот на сеќавањето се зголеми. Американската влада во вторникот процени дека производството на сурова нафта во САД ќе расте побрзо оваа година, а порастот на побарувачката ќе биде послабо од претходно очекуваното.
Организацијата на земјите извознички на нафта (ОПЕК) одделно објави дека цената на барел од нафтената кошничка на нејзините членки во вторникот паднала за 1,62 долари, на 75,47 долари.
