Двајцата лидери ќе разговараат и за вештачката интелигенција, Северна Ирска, како и за заедничките безбедносни и економски интереси, вклучително и оние во Азија.
Состанокот се одржува во време кога двете земји се обидуваат да утврдат дали Русија стои зад уништувањето на браната Нова Каховка на реката Дњепар, која предизвика поплави и принуди илјадници луѓе да избегаат, предизвикувајќи голема економска и еколошка штета. Киев и Москва меѓусебно се обвинуваат за делото.
По средбата Сунак и Бајден ќе одржат заедничка прес-конференција и ќе дадат изјави.
„Страшно е да се размислува за разговорите што нашите претходници ги имаа во оваа просторија, кога зборуваа за војните што ги водеа заедно, мирот што го постигнаа заедно“, му рече Сунак на Бајден на почетокот на средбата.
„Уште еднаш, за прв пат по повеќе од половина век, се соочуваме со војна на европскиот континент и како што направивме досега, САД и Велика Британија застанаа заедно во поддршка на Украина“, додаде тој.
Сунак и Бајден последен пат се сретнаа минатиот месец во Хирошима, за време на состанокот на Г7. Тие се состанаа и во април во Белфаст и во Сан Диего во март, на трилатерална средба со Австралија.
Британскиот премиер се надева дека ќе ги зајакне трговските врски со САД по Брегзит и сака да добие поддршка од Бајден за британскиот министер за одбрана Бен Валас како нов генерален секретар на НАТО.
