Случај на инфекција со британскиот вид на коронавирус во Хам, во Западна Германија, ја кренал полицијата на нозе, па била спроведена обемна операција во тој град, потврди денеска полицискиот портпарол.
Според градските власти, откако инфекцијата со британскиот сој Б117 била потврдена кај еден работник на градилиште, околу 100 полицајци биле испратени на местото на настанот.
Четири згради во кои биле сместени работниците се ставени во карантин, а сите што работат на тоа градилиште се предмет на тестирање.
Полицијата дежура пред зградите од понеделникот навечер за да го следи почитувањето на карантинските мерки од страна на работниците.
Британскиот вид на вирусот се смета за исклучително заразен и е еден од трите мутирани соеви идентификувани во Германија, што предизвикуваат голема загриженост кај здравствените власти.
Постоењето на новите мутации во Германија е потврдено и од Институтот за контрола на болести Роберт Кох (РКИ).
Претходно месецов, РКИ објави дека сојот Б117 е регистриран во 13 од 16 германски сојузни покраини и дека моментно сочинува едвај шест проценти од сите случаи. РКИ, сепак, предупредува дека бројот многу веројатно ќе се зголеми.
makfax.com.mk
