Шефот на руската армија во Сирија се сретна со командантот на локалните курдски сили во врска со заканата на Турција дека повторно ќе го нападне северот на Сирија, изјави синоќа курдскиот портпарол а пренесе една арапска телевизија.
Портпаролот на Сириските демократски сили кои ги предводат Курдите, Сиаманд Али, потврди дека генерал-полковник Александар Чајко се сретнал со курдскиот командант Мазлум Абди во североисточна Сирија но рече дека не ги знае деталите од разговорот.
Турскиот претседател Реџеп Таип Ердоган пред неколку дена рече дека ќе нареди копнена инвазија во северна Сирија за да ги уништи курдските вооружени групи, откако шест лица загинаа, а десетици беа ранети во експлозија во центарот на Истанбул на 3 ноември.
Русија повика на намалување на тензиите долж турско-сириската граница.
Минатата недела Турција изврши серија воздушни напади врз наводни позиции на вооружени Курди на северот на Турција и Ирак, како одмазда за нападот во Истанбул, за кој Анкара ги обвинува курдските групи.
Групите негираат секаква одговорност за нападот и тврдат дека во турските бомбардирања се убиени цивили и оти ја загрозуваат борбата против организацијата Исламска држава.
Според извештаите на либанската телевизија Ал-Мајадин, Чајко разговарал со Абди за тензиите долж границата со Турција и начините да се избегне нов голем упад на турските сили во Сирија.
Телевизијата, која има новинари низ цела Сирија, тврди дека Чајко предложил распоредување на сириски провладини сили долж границата со Турција, до 30 километри јужно од неа.
