„ФСБ спречи обид на украинските специјални сили да го саботираат гасоводот Јужен тек преку кој снабдувањето со енергија стигнува до Турција и Европа“, соопшти ФСБ. Не се знае за кој гасовод зборуваат Русите бидејќи планот за изградба на Јужен тек до брегот на Црното Море на Бугарија беше отфрлен во 2014 година и заменет со Турски тек.

Да потсетиме, на крајот на септември беа уништени делови од гасоводите Северен тек 1 и 2, со кои се доставуваше гасот до Германија преку Балтичкото море. Северен тек 1 беше отворен во 2011 година, а Северен тек 2 беше завршен во 2021 година, но поради инвазијата на Украина никогаш не беше пуштен во употреба. Русија ја обвини Велика Британија за саботирање на Северен тек.

„Според достапните информации, претставници на единица на британската морнарица учествувале во планирањето, обезбедувањето и спроведувањето на терористичкиот напад во Балтичкото Море на 26 септември годинава – минирањето на гасоводите „Северен тек 1“ и „Северен тек 2“. “, соопшти руското Министерство за одбрана на крајот на октомври.

Британија ги отфрли руските тврдења. „За да го намали своето катастрофално однесување на илегалната инвазија на Украина, руското Министерство за одбрана прибегнува кон ширење лажни тврдења од епски размери“, рече портпаролот на британското Министерство за одбрана.