Се проценува дека 473 милиони деца живеат во конфликтни зони, повеќе од едно од шест деца во светот, се вели во извештајот на организацијата објавен денеска.
Уделот на таквите деца е речиси двојно зголемен: од околу 10 проценти во 1990-тите на речиси 19 проценти денес, според УНИЦЕФ. Тие биле убиени и ранети, морале да го напуштат училиштето, немаат клучни вакцини или страдаат од тешка неухранетост.
„Според секоја мерка, 2024 година беше една од најлошите години за децата во конфликт во историјата на УНИЦЕФ, како во однос на бројот на погодени деца, така и во однос на нивото на влијание врз нивните животи“, рече во изјавата шефицата на УНИЦЕФ Кетрин Расел.
„Детето кое расте во зона на конфликт има многу поголеми шанси да не биде на училиште, да биде неухрането или да биде избркано од својот дом. Ова не смее да биде новата норма. Не смееме да дозволиме генерација деца да стане колатерал штета од неконтролирани светски војни“.
Според УНИЦЕФ, 47,2 милиони деца биле раселени поради конфликти и насилство до крајот на 2023 година. Трендовите за 2024 година укажуваат на дополнително зголемување на раселувањето поради интензивирањето на различни конфликти, вклучително и во Хаити, Либан, Мјанмар, Палестина и Судан.
© Vecer.mk, правата за текстот се на редакцијата
