Валери Герасимов, врховниот командант на руската армија, наводно бил суспендиран поради неуспешната руска инвазија во Украина, тврди украинскиот функционер.

Алексеј Арестович, воен советник на претседателот на Украина, рече дека „прелиминарните информации“ сугерираат дека генерал Герасимов е сменет од функцијата додека Владимир Путин и неговиот близок круг проценувале дали треба да му се дозволи да продолжи да ги води вооружените сили на земјата.

Официјална потврда за извештајот за смена нема, иако се зголемија шпекулациите за чистка на високите воени команданти откако генерал Герасимов не присуствуваше на воената парада во Москва на 9 мај по повод Денот на победата.

Претходно Украина тврдеше дека Герасимов е ранет во Украина. Имено, како што објави германски Билд на почетокот на мај, повикувајќи се на украинските медиуми и официјални лица, тој наводно бил погоден од шрапнел во десната нога.

Но, според последните, непотврдени информации, неговото отсуство од јавноста се објаснува со неговото разрешување.

По неуспешното освојување на Киев, руските сили се повлекоа и се регрупираа, но и го сменија фокусот кон источниот Донбас. Сепак, според извештаите, рускиот напредок наводно и таму е забавен, додека западните власти велат дека Русија не успеала да освои ниту еден град.

Недостатокот на брз успех на Русија доведе до шпекулации дека Путин планира чистка на воените лидери кои се виновни за неуспесите на Украина.

Каналот на Телеграм со кој раководи украинското Министерство за надворешни работи тврди дека уште двајца команданти биле казнети за загуби на боиштата, пренесува Индипендент.

Имено, се вели дека командантот на Црноморската флота, адмирал Игор Осипов, бил сменет и уапсен, додека командантот на 6-та армија, генерал Владислав Ершов, наводно, бил сменет. Каналот тврди дека отпуштени се и командантот на тенковската армија на Западниот воен округ, генерал-полковник Сергеј Кисел и еден од замениците команданти и командантот на 22-от армиски корпус на јужниот воен округ, генерал-мајор Аркадиј Марзоев.

Бен Валас, британскиот министер за одбрана, минатата недела изјави дека руските воени началници „се плашат дека ќе бидат сменети“.

– Во системот има напонска точка. Колку и да го почитуваат поранешниот човек на КГБ, господинот Путин затоа што е силен водач, рускиот Генералштаб ќе стане жртвено јагне поради неговиот неред – рече Валас.