Од 2019 година, смртната казна е укината со закон или во пракса во 142 земји, што значи дека сè уште се применувала во 56 земји.
Овие податоци ги објави Европскиот парламент по повод денот на меѓународната кампања „Градови против смртната казна“ на 30 ноември.
Во 2019 година, 657 луѓе беа егзекутирани ширум светот (со исклучок на Кина, каде што се верува дека се извршени илјадници егзекуции), а повеќе од 25.000 луѓе беа осудени на смрт, соопшти Европскиот парламент, кој силно се противи на смртната казна и силно се залага за нејзино укинување секаде во светот.
Бројот на егзекуции во 2019 година бил најмал во последните десет години, се наведува и се додава дека во 2019 година имало 690 егзекуции во светот, а во 2017 година 993.
Околу 86 отсто од сите егзекуции регистрирани во 2019 година се случиле само во четири земји - Иран, Саудиска Арабија, Ирак и Египет. Податоците за Кина не се познати бидејќи се сметаат за државна тајна, наведе ЕП, повикувајќи се на извор на Амнести интернешнал.
Како што се наведува, на укинувањето на смртната казна остро се противат во Азија, арапскиот свет и САД.
Во исто време, четири петтини од 55 африкански земји ја укинаа смртната казна или имаат мораториум на нејзиното извршување.
Белорусија е единствената земја во Европа која продолжува да ја спроведува смртната казна.Русија има мораториум на извршување на смртната казна, а последното извршување беше во 1999 година.
Парламентот наведува дека ЕУ дава најголем придонес во борбата против смртната казна во светот и потсетува дека сите нејзини членови го укинаа тој вид на казна согласно Европската конвенција за човекови права.
Во борбата против смртната казна, ЕУ забранува трговија со стоки што може да се користат за тортура и егзекуција, ја користи трговската политика за промовирање на почитувањето на човековите права и ги поддржува граѓанските организации во земјите со смртна казна за подигање на свеста, следење и документирање ситуацијата.
И ЕУ „гласно“ ги поддржува сите мерки за укинување на смртната казна на ниво на ОН.
Покрај тоа, Европскиот парламент усвојува резолуции и организира дебати во кои се осудуваат постапките на земјите кои се уште го применуваат овој метод на казнување.
