Вишиот покраински суд во Селе во германската сојузна држава Долна Саксонија денеска го осуди проповедник Абдуалазиз Абдула А., попознат како Абу Вала, за кого се смета дека е главен претставник на терористичката Исламска држава во Германија.
Тој добил десет и пол години затвор. Бил осуден за припадност на ИСИС и помагање при подготовка на тешки злосторства против германскиот уставен поредок.
„Абу Вала дејствуваше како претставник на Исламската држава во Германија, влијаејќи врз радикализација на многу млади луѓе и финансиски им помагаше да заминат да војуваат во редовите на Исламската држава во Сирија и Ирак“, објави претседателот на Судскиот совет, Франк Расенов.
Двајца германски конвертити кои патувале во Ирак преку оваа група, потоа извршиле самоубиствени напади со повеќе жртви.
Контактите со Абу Вала ги одржувал и Анис Амри, кој извршил терористички напад на Божиќниот саем во Берлин 2016 година.
Абу Вала има 37 години, роден е во Ирак и бил основач и лидер на германскиот исламски круг Хилдесхајм, забранет во 2017 година, поради неуставни активности. Сем Вала е во притвор од 2016 година.
Заедно со него, тројца други членови собрани околу оваа организација биле осудени за ширење омраза и поддршка на млади исламисти за одење во редовите на ИД. Тие добиле затвор од четири и пол до осум години. Еден од нив, чиј стан во Дортмунд служел како џамија и место за собирање на радикални исламисти, има и српско државјанство.