Од почетокот на пандемијата, бројот на Италијанци кои се сметаат за сиромашни е зголемен за еден милион, пишува весникот „Ил Манифесто“.
Весникот наведува дека сега 5,2 милиони немаат доволно средства дури и за основни потреби.
Зголемувањето на сиромаштијата е последица на економската криза што следеше како резултат на пандемијата, а весникот наведува дека бројот на сиромашни сигурно ќе се зголеми кога ќе престане да важи владиниот декрет за забрана за откази и забрана за протерување на станари поради кризата.
Двете уредби истекуваат во јуни и неизвесно е дали ќе бидат продолжени.
Една година по почетокот на пандемијата, два милиони италијански семејства живеат во апсолутна сиромаштија, што е за 335 илјади повеќе отколку во периодот пред почетокот на инфекцијата.
Весникот пишува дека редовите на оние што чекаат оброк пред хуманитарните организации се подолги и дека сиромаштијата ги погодува не само традиционално сиромашниот југ на Италија, туку и семејствата на северот на Италија.
Хуманитарната организација „Спаси ги децата“ објави дека поради затворените училишта на 160 илјади деца на училишна возраст не им е загарантиран еден оброк дневно кој го добивале во училишните мензи.
Најмногу загубија оние кои имаа привремена работа или работеа на црно, како што се луѓе кои чуваат стари лица или работат домашни работи или самохрани мајки со деца.
Кризата на трудот најмногу ги погодува жените, а податоците покажуваат дека скоро половина милион работни места каде што биле вработени жени повеќе не постојат поради пандемијата.
