Мажот кој помина 21 ден во задолжителен карантин по враќањето во Кина од странство, беше означен како нулта пациент на новиот бран.
Во провинцијата Фуџијан на југоисточниот брег на Кина, повеќе од 60 луѓе се новозаразени, вклучително и 15 ученици од основно училиште.
Новите инфекции за првпат беа откриени кај двајца браќа за време на рутинско тестирање во основно училиште во округот Ксиан, во близина на градот Путијан. Друг ученик и тројца родители беа позитивни следниот ден.
Експертите што ја советуваат владата рекоа дека еден од родителите, таткото кој неодамна се врати од Сингапур, е најверојатниот изворот на инфекцијата, и покрај фактот што тој беше во карантин по неговото пристигнување во Кина.
Човекот пристигнал во Ксиамен, главниот крајбрежен центар во Фуџијан, на 4 август, каде што престојувал во задолжителен хотелски карантин 14 дена. Потоа, тој поминал уште една недела во централизиран карантин на одредена локација во градот, пред да се врати во својот дом, каде што имал здравствена контрола, уште една недела.
Тој, како што пишуваат тамошните медиуми бил тестиран на вирусот девет пати во текот на тринеделниот карантин, пред да биде позитивен во петокот, 37 дена по влегувањето во Кина.
Ограничувањата во Кина и задолжителните услови за карантин за пристигнување од странство се едни од најстрогите во светот.
Кинеските власти не откриваат кога, каде и како човекот го добил вирусот, но периодот на инкубација подолг од 21 ден е многу невообичаен. Истражувачите од провинцискиот Центар за контрола и превенција на болести во Гуангдонг откриле дека делта-сојот има просечен период на инкубација од четири дена.
Инфекциите се проширија и во други градови во провинцијата. Кинеската национална здравствена комисија во понеделникот објави дека се регистрирани шест локално пренесени случаи во Квангжу.
Локалните власти реагираа со ставање десетици милиони жители во строг карантин, спроведување масовни тестирања и мониторинг кампањи и ограничување на патувањата.
Кон крајот на август, здравствените власти објавија дека епидемијата е ефикасно ставена под контрола. Иако стратегијата изгледаше успешна, експертите велат дека на кинеските власти им требало повеќе време за да ја вратат инфекцијата на нула во споредба со претходните епидемии.
makfax.com.mk
