Премиерот на Израел, Бенјамин Нетанјаху, денес го обвини Иран дека стои зад експлозијата што се случи минатата недела во израелски брод во Оманскиот залив и вети одговор против иранските интереси низ целиот регион.
„Тоа беше иранска операција. Тоа е јасно”, изјави Нетанјаху за радиото Кан.
На прашањето дали Израел ќе одговори, тој ги повтори претходните изјави за одлучност да го спречи Иран да развива нуклеарно оружје, додавајќи: „Што се однесува до мојот одговор, вие ја знаете мојата политика. Иран е најголемиот непријател на Израел и јас сум решен да го запрам и ќе удриме низ целиот регион“.
Техеран не го коментираше инцидентот ниту одговори на претходните израелски тврдења дека може да биде вмешан во експлозијата.
Израелскиот брод МВ Хелиос Реј сообраќал на релација помеѓу саудиски Дамам и Сингапур, а експлозијата се случила крај брегот на Оман, објави компанијата Дриад Глобал задолжена за поморска безбедност.
Оманскиот Залив се наоѓа помеѓу Иран и Оман, на излезот од стратешкиот Ормушки теснец низ кој поминува добар дел од светската нафта и во кој делува коалиција предводена од САД.
Нетанјаху во моментов води кампања за изборите на 23 март.
Радиото го емитуваше интервјуто по синоќешните напади кои му се припишуваат на Израел, а беа извршени против проирански мети во соседна Сирија.
Бидејќи интервјуто било снимено порано, за овие напади нема коментар.
makfax.com.mk
