Холандија ги засили безбедносните мерки во однос на премиерот Марк Руте, откако полицијата добила извештај за можен напад од криминалци поврзани со трговија со дрога, објави денеска холандскиот дневниот печат.

Иако вооруженото насилство е реткост во Холандија, насилството поврзано со трговијата со дрога стана вообичаено во последниве години, пренесува „Ројтерс“.

Неименуван владин извор го потврдил пишувањето на дневниот весник „Де Телеграф“.

Холандските безбедносни служби одбиле да ги коментираат овие наводи.

Премиерот Марк Руте, запрашан за извештајот, изјави дека безбедноста и заштитата се прашања за кои никогаш не треба да се зборува јавно.

Според „Ројтерс“, премиерот често може да се забележи како вози велосипед од својата куќа до владините згради во Хаг, а честопати му се обраќаат минувачи кои сакаат да направат селфи со него или да поразговараат.

Во последниве месеци, неколку лица низ земјата беа казнети или осудени на кратки затворски казни поради закани кон министри и пратеници.

 

makfax.com.mk