Руте моментално е во Вашингтон, каде што се сретна со американскиот претседател Џо Бајден. Руте најави дека ќе учествува во американско-германската иницијатива за испраќање одбранбени системи во Украина.
Холандскиот премиер потврди дека претходно телефонски разговарал за одлуката со германскиот канцелар Олаф Шолц и со украинскиот претседател Володимир Зеленски. „Мислам дека е важно да се приклучиме и утрово разговарав за тоа со Олаф Шолц од Германија“, рече Руте за време на средбата со Бајден.
Пред почетокот на средбата во Белата куќа, Бајден нагласи дека со нетрпение очекува да разговара за начините за зајакнување на синџирот на снабдување. Американскиот лидер, исто така, му се заблагодари на Руте што е „многу цврст“ во поддршката на Украина. Руте повтори дека Холандија одлучила да потроши дополнителни 2,5 милијарди евра за поддршка за Украина, која холандската влада веќе претходно ја најави.