Израел од следниот месец ќе дозволи ограничен влез на туристички групи, бидејќи, поради засилената програма за вакцинирање, бројот на лица заразени со коронавирус е намален, објави Министерството за здравство.
Израел ги затвори своите граници во март минатата година, а враќањето на странците ќе придонесе за зајакнување на економијата, која во 2020 година забележа пад од 2,5 проценти. Стапката на невработеност во Израел е десет проценти.
Сите странски посетители ќе мора да покажат негативен тест пред да се качат во авионот, а по пристигнувањето на аеродромот „Бен Гурион“ недалеку од Тел Авив ќе треба да направат серолошки тест за да докажат дека се вакцинирани.
Во соопштението од министерствата за здравство и за туризам се посочува дека во првата фаза, ограничен број групи ќе започнат да пристигнуваат на 23 мај. Точниот број на членови на групата не е објавен.
Во подоцнежните фази, бројот на групите ќе се прошири, а потоа ќе им биде дозволено доаѓање и на поединци.
makfax.com.mk
