Израелците тврдат дека за убиствата е одговорен припадник на египетската гранична полиција. Да потсетиме, израелски војник и војничка беа убиени вчера на воена станица во пустината Негев, во близина на планината Хариф.
Откако беа откриени нивните тела, започна голема потрага по напаѓачот, во која загина трет војник, како и самиот напаѓач. Во престрелката полесно е повреден уште еден војник. ИД соопшти дека египетскиот полицаец бил убиен од израелските сили откако бил забележан „на израелска територија“, пишува Гардијан.
Тие додадоа дека во тек е истрага, која се води „во целосна соработка со египетската армија“. Израелските медиуми објавија дека напаѓачот влегол на израелска територија преку итен граничен премин со ограда направен за да им овозможи на ИД пристап до немирниот Синајски Полуостров, каде што се активни синџирите за шверц на оружје и дрога и терористичките групи како што е Исламската држава.
Израел го отфрли тврдењето на Египет дека припадник на безбедносните сили на земјата бркал шверцери на дрога преку безбедносната ограда и дека дошло до „размена на оган“. ИД објави дека заплениле дрога и шверц во вредност од 1,5 милиони шекели (околу 370.000 евра) на границата околу 2 часот по полноќ по локално време, но не е утврдена врската помеѓу таа операција и подоцнежниот напад.
Израелскиот премиер Бенјамин Нетанјаху убиствата ги нарече терористички напад. „Израел ѝ пренесе јасна порака на египетската влада. Очекуваме дека заедничката истрага ќе биде исцрпна и темелна. Ќе ги освежиме процедурите и методите на дејствување на оваа мерка за да се минимизира шверцот и да се осигураме дека такви трагични терористички напади нема да се повторат.," рече тој.
Израелскиот министер за одбрана Јоав Галант разговараше за инцидентот со неговиот египетски колега Мохамед Заки, соопштија двете министерства. Египет беше првата арапска земја што склучи мир со Израел по Договорот од Кемп Дејвид од 1978 година. Додека двете земји тесно соработуваат за безбедносни прашања, особено во однос на Појасот Газа, египетската јавност главно се противи на нормализацијата на односите.
